कालू गणेश्वर आपरो – अहो प्रभु! ध्यान धरूं नित आपरो (Kaalu Ganeshwar Aapro – Aho Prabhu! Dhyaan Dharun Nit Aapro)

🎶 लय – अहो प्रभु! अजित जिनेश्वर

✍🏻 रचयिता – आचार्यश्री तुलसी

अहो प्रभु! ध्यान धरूं नित आपरो।। 

अहो प्रभु ! कालु गणेश्वर ! आपरो, 

नाम महागुणकार हो। 

अहो प्रभु ! ध्यावै निशदिन आपनै, 

पावै शिव-सुख-सार हो।

अहो प्रभु ! दुःषम इण कलिकाल में, 

तूं अवतरियो आण हो। 

अहो प्रभु ! भव-उदधि उधारवा, 

जिम जिनवर जग-भाण हो।।

अहो प्रभु ! चम्मालीसै आपरी, 

दीक्षा मघवा-हाथ हो। 

अहो प्रभु ! छ्यांसठ डालम थापियो, 

च्यार तीरथ शिर नाथ हो।।

अहो प्रभु ! जिण दिन तखत विराजिया, 

तिण दिन स्यूं गणिराय हो। 

अहो प्रभु! भिक्षू-शासण में करी, 

ऋद्धि-वृद्धि अधिकाय हो।।

अहो प्रभु ! देश-प्रदेश पधार नै, 

आप कियो उपगार हो। 

अहो प्रभु ! वचनामृत बरसाय नै, 

तारया बहु नर-नार हो।।

अहो प्रभु ! तूं मुझ तन-मन बालहो, 

तूं हिवड़ा रो हार हो। 

अहो प्रभु! रोम-रोम मुझ तूं बस्यो, 

जाप जपूं इकसार हो।।

अहो प्रभु ! तुझ मुख पूनम चन्द-सो, 

चितड़ो बण्यो चकोर हो। 

अहो प्रभु ! एक निजर निरखूं सदा, 

समरूं जिम घन मोर हो।।

अहो प्रभु! सुरतरु वंछित पूरवा, 

तरणी सम तप तेज हो। 

अहो प्रभु ! शिव सरणी तूं सुखकरूं, 

निरख्यां उपजै हेज हो।।

अहो प्रभु ! समचित वेदन तूं सही, 

मन नै राख अनन्न हो। 

अहो प्रभु ! जग जश जबर जमावियो, 

रह्यो सदा सुप्रसन्न हो।।

अहो प्रभु ! नाम निरन्तर आपरो, 

राखै हृदय मझार हो। 

अहो प्रभु ! तसु इह पर भव में सदा, 

होवै जय जयकार हो।।

अहो प्रभु ! स्मरण करै नित आपरो, 

चिन्तामणि सम जाण हो। 

अहो प्रभु ! तसु तन-मन संकट मिटै, 

पावै कोड़ कल्याण हो।।

अहो प्रभु ! अक्षय गुण गणिराज रा, 

इक जिह्वा न कहाय हो। 

अहो प्रभु ! किंचित-सी स्तवना करी, 

‘तुलसी’ हर्ष अथाय हो।।

अहो प्रभु ! उगणीसै तेराणवै, 

दुतिय भाद्रपद मास हो। 

अहो प्रभु ! गुरुवर रा गुण गाविया, 

गंगापुर सुविलास हो।।